Përkujdesje

Teksti nga Manlio Sgalambro dhe Franco Battiato

Kompozuar nga Franco Battiato

Do të t'mbroj nga frikërat e sëmundjeve

nga trazimet që nga sot do hasësh në jetë

nga padrejtësitë e mashtrimet e kohës sate

nga dështimet që natyra jote i tërheq si magnet.

Do të t'lehtësoj nga dhembjet e luhatjet e humorit

nga makthet e manive të  tua.

Do t'kapërcej rrymat gravitacionale,

hapësirën dhe dritën që mos të t'lë të plakesh.

Dhe do të shërohesh nga çdo sëmundje,

sepse je qenie kaq e veçantë

dhe unë, unë do të t'kujdesem për ty.

Endesha nëpër fushat e Tenesisë

si kisha mbërritur atje, s'e di.

S'ke lule të bardha për mua?

Ëndrrat e mia më t'shpejta se shqiponjat

përshkojnë detin.

Mbi të gjitha do t'sjell qetësinë dhe durimin

bashkë do t'përshkojmë udhët që shpien drejt thelbit.

Kundërmimet e dashurisë do t'dehin trupat tanë

bunaca e gushtit s'do t'i platitë shqisat tona.

Do t'i thur flokët e tu si vargjet e një kënge,

i njoh ligjet e botës dhe ty do të t'i fal

Do t'kapërcej rrymat gravitacionale,

hapësirën dhe dritën që mos të t'lë të plakesh.

Do të t'shpëtoj nga çdo melankoli

sepse je qenie kaq e veçantë

dhe unë, unë do t'kujdesem për ty.

Po, unë, do t'kujdesem për ty.

Përktheu: Aida Baro

Lutje në janar

Teksti dhe muzika: Fabrizio de André

Mbushe, O Zot, me lule

udhën ku shkon ai,

kur ty shpirtin e vet

dhe botës trupin e tij

do t'i duhet t'ia kthejë,

kur të vijë në parajsë tënde

atje ku yjtë shkëlqejnë

edhe në mes të ditës.

Kur të kapërcejë

të mbramen urë të vjetër

t'vetëvrarëve do t'u thotë,

në ballë duke i puthur

ejani në Parajsë,

atje ku shkoj dhe unë,

sepse Ferr nuk ka

në botën e të mirit Zot.

Le të mbërrije te Ju

me t'tijat kocka t'lodhura

i ndjekur pas nga mijëra

të bardhash krejt fytyra.

Lëreni që te ju të kthehet

mes të vdekurve për fyerje

që ndaj qiellit e tokës

treguan guxim'n e tyre.

Zotërinj mendjendritur

uroj keq t'mos ju vijë

që në qiell, mes shenjtorësh

Zoti, mes krahëve të tij

dënesën do të mbysë

të atyre të mekurave buzë

që vdekjen parapëlqyen

jo paditurinë e mllefin tërkuzë.

O Zot mëshirëmadh

tënden Parajsë të bekuar

mbi të gjitha e krijove

për ata që s'qeshën kurrë,

për ata që kanë jetuar

me ndërgjegjje të kulluar.

Ferri ekziston vetëm për ata

që frikën ia kanë.

Më mirë sesa ai askush

s'mund të të tregojë kurrë

gabimet e ne të gjithëve

që mund e do të falësh.

Mbaj veshin zërin e tij

që tash këndon në erë,

O Zot mëshirëplotë,

e i lumtur do të jesh.

Përktheu: Aida Baro

Preghiera in gennaio

Preke tokën, preke Zotin

Teksti dhe muzika: Juri Camisasca

Këtu në Kurrkund, viti i ri ka ardhur në kërkim të prehjes shpirtërore, ndaj dhe kjo këngë më frymëzoi përkthimin e parë.
Juri Camisasca është një këngëtar italian, me një jetë fort të tallazitur, në krye hipi, më pas prift benedektin, iu rikthye skenës në fund të viteve '90, (periudhë kur u shkrua dhe kënga "Prek tokën, prek Zotin") dhe sot është kthyer në një eremit. Por këngët e tij, ku ndihet gjurma e mikut të vet, Franco Battiato (një tjetër muzikant intelektual do të thosha), janë ekzistencialiste dhe spirituale, ku teksti dhe muzika të shpien në të tjera dimensione.

Si përherë të forta janë ngjyra vjeshtore

e të përpikta edhe sot stuhitë verore,

ngjarjet përsëriten. Ndiej një barrë që më shtyp

dhe harrohen shtirjet.

Preke tokën, preke Zotin.

Nuk e di më se kush jam.

Krejt i vetëm në këtë dhomë

dal e bredh në qendra qytetesh,

si barrë plumbi rëndohem rrezatimesh.

Mbrëmja ka rënë tashmë.

Në kiminë e mendjes sime

përjetoj të tjera kombinime.

Preke tokën, preke Zotin.

Nuk e di më se kush jam.

Dhe tashmë mbrëmja ka rënë në kiminë e simes mëndje.

Preke tokën, preke Zotin.

Nuk e di më se kush jam.

Përktheu: Aida Baro

Tocchi terra tocchi Dio